曹SIR都教導人快樂之道

今日（二十九日）信報曹仁超的《投資者日記》都誨人要珍惜現在：

追求成功容易迷失方向

繁忙嘅都市生活好易令人迷失方向。1997年前香港唔少人沉迷於炒樓炒股，每天返工放工忙這忙那，飛到世界各地開會，以為自己賺咗許多！突然之間樓市泡沫爆破，所謂財富一下子冇晒……。人許多時需要反省到底自己在做什麼？什麼才是「實在」的生活？

其實生活可以好簡單，一天三餐晚上一張床，良伴在身旁，加上朗月清風，已經可以好愉快。如果財政上能夠唔再依靠別人便更加愉快。我地擔心嘅、追求嘅、努力希望獲得嘅，統統唔重要！最重要係身體健康，家人關係良好，三餐一宿已足夠，如果能夠同時享受工作便更加好！早點起床去晨運已係好享受，午間抽空同太太食碗魚蛋粉，滋味無窮，晚飯後同女兒一起睇電視樂也融融。人生最好嘅東西其實好便宜，需要大量金錢購買嘅東西大部分都冇乜用！

成功本身好似陷阱，幾多人為追求成功而努力工作，好少享受，擔心做人樂趣太少，健康日差仲以為自己幾「成功」。或者你應靜下來細心想想，到底自己要乜嘢？你如何支配你嘅時間？係咪用嚟自我毀滅？只要你肯接受現實，願意改變，我老曹保證你開心許多。用80％時間去做事，留番20％時間去享受，例如一家人到長城行吓做好漢，或者去學潛水，發展自己嘅藝術天分，同子女齊齊做D驟眼睇嚟好似好無聊嘅事，都會令你感受到生活好實在。

財富、健康與快樂人生應該有適當分配！