The Dukedom of Aberdeen 香港仔公國

太陽報的報導：

《特區日記》　獨門秘技「你要信我」　麵包過期五日董太妙手回春

啱啱先同大家講過，特首夫人董趙洪娉公開教OL「撚手隔夜麫包翻熱法」，即係只要將啲隔夜麫包喺水龍頭沖吓，再用保鮮紙同濕毛巾包住放喺微波爐叮，個包就會變番軟熟。

拉入廚房送驚喜

上大人對呢種做法都係半信半疑，亦冇諗過要食隔夜麫包，點知後來又喺一個場合撞到董太，董太話要畀啲「Surprise」（驚喜）上大人，一手拉咗上大人入廚房、閂埋門，神神秘秘咁喺雪櫃坃咗個奶皇包同埋叉燒糯米卷出嚟！

董太語重心長咁話：「呢個方法真係Work（有效），你要信我！」佢仲特別強調呢兩個係「過期五日」嘅包，已經硬晒，但只要「叮一叮」，即刻變番新鮮咁好味！跟住就用佢嘅獨門秘技「叮」冲兩個包。今次唔係數十聲，係叮一分鐘後，董太坃出嚟請上大人食。

為慳家買死魚食

雖然上大人同董太講「有啲飽」，但係佢盛意拳拳又講一句「你要信我」，上大人惟有食哂個奶皇包，而個包嘅奶皇同啲油已經分開哂，好彩，無乜怪味，但食完之後，上大人就成日都無晒胃口！

好多人都知道董太慳家，喺美國三藩市唐人街住嘅老友同上大人講，董太以前專買死魚返屋企食，事關死魚同新鮮魚嘅價錢相差成一美金！不過，慳還慳，食物宪生好緊要，如果唔係食到屋企人變「三○老公」、「三○仔仔」就唔好啦！