你也梳理一下你個貓樣吧。

李：你覺得呢個年紀嘅人，有乜共同特色？
我：太多人云亦云的共同價值，例如買樓、幫子女報名校，太少個人特色。

李：除咗呢樣，生活上呢？
我：鍾意邊鬧邊睇垃圾媒體提供嘅垃圾內容。

李：有乜差異？
我：乜差異呀？無乜差異丫。

李：你係咪覺得呢代人好鍾意激烈情緒同情感上得到愉悅？
我：問番你轉頭有邊一代人唔鍾意情感上得到愉悅先（如果你意思係鍾意開心咁簡單），至於激烈情緒，兩睇喎，我反而覺得呢代人有D好呆下，至少已經無左為理想搞革命既激情。

李：自拍愉悅係咪快樂一種？自拍同反叛有冇關係？
我：愉悅同快樂有咩分別先？拋書包唔緊要，但都要答嘅人同聽嘅人知道你講咩先得，你最好先解釋清楚。你後面個問題，亦語意不詳，勉強答只會愈答愈混亂。

李：自拍同反叛有冇關係？
我：咩叫有無關係先？係相似關係定係因果關係？唔講清楚我唔知有咩關係。

李：有冇曾經後悔？例如為讀書冇睇一場騷。
我：人生的後悔又何止無睇一場騷呢。

李：對於我冇睇騷，你有乜comment？
我：你還你我理得你。

李：依家年輕人係點？
我：他朝會變老，然後當中會有D變成老屎忽恃老賣老。

李：咁你有冇衝動同欲望梳理1自己？
我：老老實實，就當真係想梳理自己喇，係咪應該唔好響衝動同太多欲望嘅時候去梳呢？你個問題中「衝動同欲望」五個字其實係咪改成一個「想」字仲簡單清晰？如果係，我答你，我唔想梳住，老D先再梳吧。

李：你覺得年輕人追求自己或做緊乜嘢係咪好重要？
我：做緊乜嘢唔重要，追求同性和異性都唔緊要，最緊要唔好追求自已。追求自己即係自戀，咁好陳志雲。

李：快樂對你o黎講係咩？「你快唔快樂」？
我：呢一刻快樂係唔使比你再問落去。唔使再答就快樂。

現在才玩有點遲了，我跟佢隊尾：與李教授激情對答

  1. 我想問，究竟係梳理還是疏理？我見報章兩個都有用。 [↩]