Oct 09 2007
小時候：黃竹坑邨
該邨原是政府於1962年推出「政府廉租屋計劃」中的16個廉租屋邨之一，也是唯一在港島興建的政府廉租屋，共分三期與建，採用舊長型設計，第1及2座於1968年11月落成；第3至6座於1972年10月落成；第7至10座於1973年8月落成。
房署曾於1983到84年間，為所有樓齡超過5年的公屋進行全面勘查，發覺有不少大廈的石屎強度均未達標準，當中有26座大廈更低至不能接受的地步，並有即時倒塌危險，這些「問題公屋」需儘快清拆，在黃竹坑邨樓齡只有15年的第9座便是其中之一，因此早已於1988年中拆卸，原址被改建為一梯形花圃。
根據房委會的「整體重建計劃」，黃竹坑邨會被清拆重建，並已於2007年9月28日關閉，大多數租戶均在9月27日前遷出，只有10數戶因特殊情況而獲得2週寬限期。大部分租戶會被安置往重建完成石排灣邨。
根據未來的計劃，黃竹坑邨的原址將興建地鐵南港島線的車廠。而黃竹坑站亦會成為未來地鐵西港島線及南港島線的轉線站。
資料來源：Wikipedia
讀一讀維基，才知自己跟黃竹坑邨差不多在同一時期誕生。我不是邨中人，卻因為當時父親在黃竹坑的工業區有家小工廠，因此在邨內的黃竹坑天主教小學讀了三年書，小四到小六。小學的下層有家保良局壬子托兒園，我就是壬子年生。我弟弟進了這家托兒園兩年，然後上黃竹坑幼稚園，之後再跟著我在小學讀足六年，所以他在黃竹坑的日子比我長。
我和弟弟在九月三十日回到黃竹坑邨，巴士站旁的好景酒樓已結業多時。整個屋邨圍上了鐵欄，門衛見我們帶著相機，便說當作我們是去光顧邨內最後一天營業的郵局，通融我們進內，並囑咐只可在地上行走，不准上樓。其實我們也不能上樓，因為各座地下多年前已加裝了鐵閘，跟我們兒時的情況不一樣。以前，屋邨十座樓是相連的，層層相通，壞人溜了上樓，根本無法捕捉。
就這樣，我們在邨轉了一圈，曬了半個下午，拍了很多照片。
所有單位空無一人，店舖的告示說，早在去年除夕就已結業，感謝街坊三十多年來的支持。陽光充沛的周末午後，無人的屋邨，籃球場、遊樂場都空空洞洞的，感覺得詭異。
兒時的回憶很模糊，只記得我的圖書證是在停於邨口德明書店前的流動圖書車上申請的，借的第一本書是翻譯小說《白鯨記》（Moby Dick，應該是簡易版吧）。新寶快餐店用的是內燙錫紙的紙飯盒，腸仔蛋飯上的茄汁是螢光橙色的。四座的炸魚蛋用的是肯定有致癌物質的萬年油來炸，是當時的人間美食。小店還會把大陸的紅雙喜香煙拆散，幾毫子一支賣給十八歲以下的小童。
廉租屋邨當然有飛仔飛女，小四時未分班，坐我旁邊的是個早熟的美少女，已有契哥照顧，我連跟她多說句話都不敢。小五時分了A班，才少了和邊緣青年的接觸。後來我聽說，那美少女十六歲便懷孕結婚。
七十年代來初搬進黃竹坑邨的都是新婚家庭，孩子都年幼，一個邨就有三間小學、兩間幼稚園。後來孩子都長大了，上下午校變了全日制，三間小學逐一被殺，我和弟弟的那間算邨內最佳，死得最後，卻也因為收生不足，不能遷往其他區繼續辦下去。
昔日的建築會被拆卸，舊時的記憶也會隨時光流逝。兩鐵已成功合併，列車能跑到黃竹坑，香港仔與大埔之間有鐵路相連，也不能說是壞事。
Flickr相簿 （逐張相介紹）
好似好好玩咁
以前我家住大角咀的
常坐船往中環
再往梅窩
還在碼頭的大排擋
幫過手 - 凍o水
公園仔你好~ 我路過架~ 我以前住黃竹坑既~
其實我都好懷念以前好多美食, 例如你講既炸魚蛋, 木頭車炒米粉, 仲有d街邊小食……..
我諗之後都好難食得番啦…..
雖然只是黃竹坑居屋的居民,都很懷念祥興16蚊一個有湯有飯有野飲既set lunch !!!
etranger，那大角咀的船，我兒時也常坐。
Joy，對呀，我不懷念建築，懷念食之味。
公園仔: 我成日去碼頭玩嫁
熱到中暑都好話有個 so uk 的 exhibition
展期到呢個weekend
我以前在嗰度ge社區中心
教過新移民班
d小朋友都ok勤力
又聽話 都教得幾開心
不過嗰個社工話我任性喎 (指去法國讀書)
我返咗來之後都有探過佢
唔知佢now點呢
嗰陣我一日返三份工
在幾個月之內
儲夠錢去法國讀書
etranger，有趣有趣，自己掙錢讀書，最馨香。
公園仔，你真有心。這135張相片我逐張細閱，多謝你為我們留下這些集體回憶。我想由於你是就讀8座附近的天主教小學.故第1座遊樂場及鄧肇堅小學，舊小巴站以及警察學堂宿舍及入口.
我是第一代居民，約1968年從鴨脷洲木屋搬進第二座.當時非常荒蕪。鄧肇堅小學仍未啟學.搬進后第一年仍照舊孤身坐壹毫子小巴前往香港仔，然后轉船到鴨脷洲,上岸后行山路到鴨脷洲街坊小學上一年班。故初初遲到的時候，訓導主任亦沒有深究。第二年入讀鄧肇堅二年班,由於是香港仔避風塘一帶居民佔多。多是漁民子弟.還記得讀五年級時超過一半同班同學要到民政處宣假誓證明自己六年級考升中試時不超過十六歲.
六，七十年代歲月艱苦,同輩父母多是文盲,故小學女同學畢業后父母都已經覺得待她們不薄，是時侯她們到黃竹坑或田灣工廠打工回饋家庭供細佬讀書.而男同學泰半有社團背景。但對侍我們這些細細粒同學仔亦好斯文。
中學會考那年,晚飯後由ニ座經走廊前往九座山邊閣樓宣道會自修室温習。翡翠劇場正播放”奮鬥”。全個屋村都是甄尼的歌聲.加上自己當時的心情,情境至今難忘
往事如煙,欲語還休，有空再交流
Peter Leung，謝謝你的留言分享，讀著我很感動。
對，我和弟弟都是讀黃竹坑天主教小學，弟弟成績比我好，還獲學校保薦入讀港島一家天主教名中學。
我們很可能見過面的，因為我兒時也是住在鴨脷洲白沙灣的木屋（應該是現時利東邨的位置吧），母親也只讀過幾年小學，跟你一樣讀鴨脷洲街坊小學。我家後來搬進了鴨脷洲惠風街，後來又遷往香港仔。
你說得對，以前生活艱難，很多人都沒有讀書的條件，加入社團也是尋常事。我記得以前在鴨脷洲，社團甚至有為街坊維持治安的作用，有陌生人入來，會查問，卻不會滋擾居民。我父親那小工廠的工人，大多時黃竹坑的居民，有些家庭也會拿外發工回家做。
回憶永留心中，或這樣化成文字，都好。
你好呀，我也是黃竹坑，我係住在十座的，我還記得８０年代衫還有第九座，之後因為九座建築有問題要拆，次後十座ｄ人就要行好長的樓梯上上面買野，仲有其實超群ｄ野都幾好食，唔知你仲記唔記得四座有兩檔賣炸魚旦，其中一個係女人負責的，好耐之前仲有五毫子一杯奶水飲添，呢ｄ一點一滴真係帶比我好多好多的回憶，仲有８０年代榭仁中學對面的公園仲有馬騮架，仲有一條好長好長的”sir”滑梯，好多謝你影咁多相可以比我地呢一班黃竹坑之友集體回憶，謝謝
joey lee，寫寫你的分享。我有個一同升上中學的同學就是住九座的，不過他在未拆前已遷往香港仔。
四座炸魚蛋當然記得，還有雞翼尖。奶水你提起我才記得，除了奶水，還有冰多，冰益力多。
馬騮架和長滑梯因為危險，現在已幾乎絕跡了。
仲有你還記得每當晚上黃竹坑的小食嗎，好耐以前有一檔賣椰汁的好好味，仲有腸粉，仲有一檔賣粥的，而早上返學時間竟有一檔阿叔賣的炒米粉和糯米飯，仲有新寶的野食好好味架
joey，對對對，一入夜就有很多小販在新寶附近擺賣，有賣各式冰飲的，還有一檔是賣炸番薯和炸蘿蔔盒等炸物的。
還有2座小巴站近鄧肇堅小學樓梯的”大菜糕”小販，各種不同顏色的塑膠蛋殼內有冰涼美味的”大菜糕”。I just want to make such blog for a long time…thank you did it!
係呀,佢地用玩具蛋蛋殼整的,朱古力大菜糕……好似都要一蚑…….不過我吾係在二座買的,因為佢都會去到我屋企門口,推住車仔賣…..
你好.
我都是在黃竹坑天主教小學畢業的
看到這輯相令我回憶了很多…
亦想自己去影一輯
不知現在還可不可以進去呢..?
無論如何 謝謝你!
這輯相拍得很好很漂亮
如可以的話..請send一部分給我
pagepage228@hotmail.com
thank you!
KAi，對對對，我也記得那些蛋形大菜糕，小時候覺得很好玩很不可思議。
Page，那我們是舊同學了。照片方面，你可以用你的Yahoo ID登入我的Flickr，照片是可以下載原大SIZE的。
http://www.flickr.com/photos/doa/sets/72157602283351258/
大家好!
我住喺四座,由細到大都喺係黃竹坑村長大,由貞德幼稚園開始,再入讀天主教小學至到畢業.真係有好多嘢懷念,以前讀小學時派報紙所以每座都有去(天地人茶餐廳,金冠辦館…..等等),所以今日到番去影吓相留念,另外我問咗啲”食蕉”好似21/11佢哋都失業,唔知係咪拆.
Ming，拆呀，有來起南區地鐵交匯站。
你好啊！
小弟就唔係黃竹坑村居民，不過都住過呢種「政府廉租屋村」，
你d想令我諗翻起細個響同期落成ge石蔭村住果一段日子…
真係好佩服以前班工程師夠膽一字排開起咁大座樓，
如果第九座無拆，成個黃竹坑可以係得一座樓…
公園仔，你介唔介意比你呢堆相ge原相我？
因為近來小弟想用電腦「重建」呢類舊屋村，越整越發覺各個位都分好多類設計
正好黃竹坑好多都齊…可惜發現果陣為時已晚，去影果陣已經圍緊網…
之前未圍時影ge相又影唔到想要的地方…
所以希望你可以協助下，先謝XD
TD618，你到我的Flickr相簿，用Yahoo! ID登入，自然可以拿到照片的原大圖。
http://www.flickr.com/photos/doa/sets/72157602283351258/
e 都係天主教小學
不過我係西九龍嗰間
公園仔, 你好, 多謝你D相比我諗返係黃竹坑村D回憶. 上星期, 我番去影咗D相(係外圍),整個村已經比網圍住啦!!! 我都download咗你D相, 係度多謝你先!
另外, 我係Facebook開咗個Group (We grew up in Wong Chuk Hang Estate (我們在黃竹坑村長大)). 如你們有興趣的話, 可以jion. 分享對黃竹坑村的回億!!
etranger，西九龍？油麻地嗎？
Terence，加入了，也因此還發現，我有些大學的同學，原來都係黃竹坑。
係大角嘴
一分為二
下午校去咗海帆道
沒有殺校，還一分為二，好近。
其實天主教辦學唔差
我都係響黃竹坑長大, 我今年32歲…..跟大家一樣在邨內讀幼稚園,小學。記起當時小學派了成績表成績好,媽會帶我去西湖食野(因為放工都已經係七八點,邨內就腳),其實都唔係好鐘意食西湖, 但夜左就得番西湖, 冇得簡。 記起現在深灣的百佳前身好似叫”乜威超市”當時跟老豆去 shopping真係好正, 我地會帶埋計數機去計, 當時收銀收得好—慢因為係續件貨人手計價錢(冇Bar code), 當收銀呀姐計完我就會對數以防計錯(其實通常都對唔”ARM”)唔係佢錯就係我錯….哈哈…依家幾有好Bar code唔洗煩, 跟住就係拎住大袋細袋行果條大斜路番屋企(都幾甘嫁), 路經就係包玉剛泳池, 一大陣漂白水味迎面而來(我係響包玉剛學識游水嫁), 以前放學後有一批同學會去八座小童群益會做功課(其實係抄功課大會)小弟都層經出席獲益良多, 提起食四座炸魚蛋, 我當時四五年級我地成日放學後一大堆人一齊去食, 當時因為人多而又得一個年老呀伯做, 佢又要收錢又要煮,有人會成亂冇比錢食魚蛋 (其實都好多人係o甘)呀伯都請左好多人食魚蛋, 響六座報紙檔前扭五毫子蛋, 響開明德明看玩具(沒錢買), 響四通八達o既邨內玩捉(範圍係成個邨o甘大, 通常都lay左番屋企), 太多太多回億….小時侯….
多謝你比個地方大家想當年….多謝晒
水魚，我也不喜歡吃西湖，卻很想念四座的炸蛋。我也謝謝你，寫那麼長的跟我們分享回憶。
深灣百佳前身叫”健威”
仲有開明書局前身好似叫成德書局…….
不過德明正D,因為多D超合金同模型………
係”誠德書局”呢, 記得好早就已經結業。我都係黃竹坑大，因而細時印象:書局=玩具店! 記得我第一盒超合金就在德明書局買既呢。
你好, 各位, 我也是在黃竹坑長大的, 這篇文章及圖片也很好, 以上各人所講的, 都十分有共鳴, 讓我進入回憶之中, 想起很多. 炸蛋真係好好味啊, 入夜後第四座對出的小販真的很多,每樣都很好味呀. peter leung所講, 公園仔沒有影太多的第一座及鄧肇堅小學附近的相片, 因我也是讀鄧肇堅小學的. 馬騮架, 長滑梯, 還有盪鞦韆…, 塑膠蛋殼大菜糕啫哩一定記得啦, 新寶的漢堡飽及蝦多士好好味啊. 小時最愛逛第二座及第五座這二間書局. 還有很多很多……., 最後公園仔, 你這輯相片可否也給我一套呀.
ivy，對呀，四座的炸蛋的確是沒話說的。不好意思，我們繞了一圈，回到近入口的鄧肇堅小學，天色已不早，而且我的記憶卡也滿了。。照片方面，正如之前說過，你可以用你的Yahoo ID登入我的Flickr，照片是可以下載原大SIZE的。
http://www.flickr.com/photos/doa/sets/72157602283351258/
公園仔, 很多謝你的回覆及答應呀~ 了解的, 你是天主教小學的, 很自然會集中在這裡的, 想把學校的裡裡外外都拍下來留念. 對於在黃竹坑長大的我們, 這些照片很珍貴的, 是不能再看得見的回憶~
我也住過黃竹坑
多謝你香港仔! 喚起了我不少回憶.
我家也曾住在黃竹坑邨達24年, 但維基網對黃竹坑邨的介紹一定不正確, 因為在南區建得比它早的還有舊田灣邨( 幾層高的, 沒有獨立廚厠, 不知是否與石峽尾邨同期), 舊石排灣邨(67年落成, 我們這家水上人就是在此年上樓, 很高興. 我就在羅宗淦紀念學校完成小學階段, 至74年再搬入黃竹坑 ), 可能還有華富村. 至於中學階段則在西區半山就讀, 天濛光(或未光)就去搭巴士, 通常七點半以前已經回到學校. 試過有次睇錯鬧鐘, 四點多(以為是六點半)就上街去, 只見一路無人, 到了車站再看手錶才飛奔回家. 那時我住十座, 沿途靜英英, 嚇死人.
對於黃竹坑最深的印象當然是四座的街市和二三四座的商鋪. 沒多買零食, 所以不知道有那麼好吃的炸蛋, 街市裏頭那一檔抵買和好相與則很清楚.
德明書店供應了我一切的文具用品, 也有玩具, 沙灘用品和書籍. 試過有次我和弟弟在月頭在此合資用一個月的零用錢, 買了個吹氣的船(或浮床), 只用了一次便破了, 肉刺得很! 在打了多時書釘後, 我也終於買了個人第一套課外書: 飄. 另一次為學校學會漏夜買了甚麼文具之類的東西, 會長學姐驚異我竟然可以在晚上在樓下”有鋪頭可以買東西咁得意”, 我也很詫異這有甚麼特別? 後來才曉得學校不少學生非富則貴, 住在花園洋房大不乏人, 難怪她不知道這些屋邨商鈉鋪!
ivy，還有小小，不用客氣，有人喜歡我拍的照片，我也很高興。
小小，謝謝你分享你的記憶。
對了，你們有沒有吃過德明旁那辦館的孖條？可樂味呀橙汁味呀，食到成口色素，包裝是用紙的，要吹氣打開。
你們好, 太多的回憶未必及時記起, 每人加多一點, 回憶又再多一點.
孖條有吃過, 包裝是用紙的………
小時候真的很愛逛文具鋪, 覺得很多東西看的……..
公園仔,你好!
首先好多謝你的照片.
以前,我都係住黃竹坑十座的,小時,讀黃竹坑幼稚園……..及天主教小學….
在86年,搬到了柴灣.
有幾樣野同大家分享下.
1.第四座新街市內的炸魚蛋好正,好大粒(因為炸到發大左,但此食物我從未在外面見過,炸魚蛋都有………但發到乒乓波甘大粒,,,,,,,,,見過未?仲要一落甜醬就縮水…….),雞尖,冰多—->即係益力多冰,廿年前都要一蚊枝.而家我有時都仲有食……………五毫子一次的潛野……..,
2.在基恆小學背面有條斜路我直落到九座後面,小時同D朋友玩並經常用防風板滑落去,好似坐雪Hill咁…………
3. 成日都見倒人在屋邨空格果D空地做白事…夜晚叮叮down.down……,.好驚……
4. 有選舉時天主教馬校長會拉票…..好似都幾落力.
5. 成日有腸粉,大菜糕在門口賣,.
6. 天主教果時有一對孖女.我記得性曾既,佢地成日都考第一,二………..佢地如靚架…….
以上為小小分享……..
Vincent
28 Jan 08
Vincent，不用客氣，讓我也回應一下你的分享。
1）這種炸蛋我來外面見過一家，是在香港仔培德小學對面的廟，及後面祟文街一帶開檔的一個老伯。只帶著一桶萬年油賣炸蛋。雞尖和冰多都好正，還有冰木瓜。
4）馬月霞校長好像還當上過南區區議員主席，是接另一位南區校長陳若瑟的棒。
5）塑膠蛋形大菜糕是在弟弟讀的黃竹坑幼稚園門外擺賣的，好像也有在大廈內行走的流動小販。
6）孖女嗎？我記得我班有個要曾X詩，成績的確很好，也的確是靚到有些鬼妹樣的。
Kung Hei Fat Choi,…………
All the best in the Mouse Year!
我之前都係住黃竹坑,
幼稚園係讀貞德架..
而小學就同你一樣,
都係讀黃竹坑天主教小學,
睇返呢D相,
真係好懷念以前,
我三年級個陣,
就搬左屋,
之後都係返左去一兩次…
依家睇到呢D相真係好開心呀…
你介唔介意我拎去哂呀??
SUKI，沒問題呀。
你好唷`
我之前都系住黃竹坑`
我依家搬了很遠`
有次我有時間番去睇下`
咩都吾同哂`”咩都睇吾到`
好掛住細細個個時`”
日日放學就系街市`
有大啵個街市`
個時真系好開心`
我都系讀黃竹坑天主教小學`
我下午班的`
那我們是同門了。對，那時候真的好開心。
我有好的多黃竹坑Ｄ相,想拿可比你,92026198黃生
MY blog: http://hk.myblog.yahoo.com/rolywong2006/
有冇人知天地人搬了去邊
aitken，不清楚呢，我只知有些店搬了去其他南區公共屋村繼續經營。
你好
天地人蘭姐話唔做la
仲有德明門口有個阿姐的炸大腸..有時會在二座小學度有10元一打相影添~
有時我會唸..如果黃竹坑起屋..有錢我一定會買番間住..一定另有一番滋味~
sally，炸大腸我有些印象。
公園仔多謝你
由細住到大,太多回憶,幾位哥哥逐家逐戶敲門高呼”收租”,隨行姐姐會進入預備交租的單位內收租,開枱,擺櫈,姐姐坐啦!飲杯水啦!新年舞獅,東華上門籌款,手拉車叔叔白糖糕,西米糕,街邊檔碗仔翅,四座炸燶旦,生菜魚肉,炸雞奕尖,天地人讀小學時天未光由後門入去食早餐嘅風味,竹林辦館,金冠辦館,新寶快餐,德明書局,開明書局,邨內個街市小食檔,雜貨檔,菜檔,豬肉檔,雞檔,生菓檔,看著你的照片勾起無數回憶;番學,買餸落雨無有怕,因為每幢大厦互通;玩兵捉賊四圍走地方都大好多;開心回憶有,不開心都有,記得當時讀緊四年班,唔須要番學時同姐姐,哥哥去四座買零食,行到去派出所門口,突然間覺得大腿好痛,一望之下流緊血,梗喊啦!我哋入去派出所向警察哥哥求救好彩無事,警察哥哥好好人,我們懷疑有衰人亂扔石仔,以後我都唔敢著短褲出街;最慘是留有疤痕;八座對出山坡曾經重創我哥哥,望著他為了拾回最愛的紙飛機失重心,由成層樓高跌落地面,兩隻小腿骨碎咗超過五成,然後媽媽每日放工都要孭他去看骨醫(當時哥哥都有六七十磅架),好唔開心;足足維持了兩個月,好彩醫得番,韆鞦,馬騮架,氹氹轉,好景洒樓與梁朝偉,呂方相距隔離枱飲茶(當年在警校拍攝新紮師兄),還有嫲嫲的離去;姨甥的來臨,回憶實在太多,單位雖然細,但關係更緊密;好衷心多謝你為黃竹坑邨記錄了最後的一刻,亦為我們帶來了最快樂的回憶;如果可以在屋邨拆卸前一晚,可以再入去見番所有的人和事一起渡過黄竹坑邨最後的一夜就好喇!不過都知沒可能了,我仲知道”烈火雄心3″會在黄竹坑邨拍攝,我在此高呼”黄竹坑邨”你可以星光熠熠地”光榮引退”了
ay，非常感謝你的分享。
和一些親朋談起我是黃竹坑的現任區議員時，他們大多會奇怪地問：黃竹坑邨不是拆了麼？我呢，則必須耐心地解釋：黃竹坑除了黃竹坑邨以外，尚有雅濤閣、南濤閣、金寶花園等等；而且，因為黃竹坑邨的搬遷，黃竹坑的選區也”大變身”，現在連遠在香港仔那邊的逸港居和俗稱”十五間”的私樓區也屬於黃竹坑選區了……
“哦，這樣啊．”通常他們這樣回應。
老實說，我並不知道他們明不明白。
徐議員，聽你咁講我都好同情，可惜你在此申訴其實有點九唔答八，我恐怕對事情也沒大幫助。
公園仔好多謝你d相
我都係住黃竹坑的,本來有打算在搬遷前最後一日去黃竹坑影相…但當我想實行呢件事時已經過了9月份..所以影唔到相…但而家睇到有咁多相真係好感動…我唸我係呢度係比較年輕吧..我在88年就讀貞德,之後都係讀天主教小學上午校,再上就是陳白沙…所有學校生活都在黃竹坑…還記得小學時,都比較頑皮…放學後去左小童d功課班做功課…做完就同一大班同學仔係出面個公園玩捉,去天主教出面錫波,去,係小童借野玩,打兵兵球等…個時好多同年既小朋友都會去小童玩…個時真係好開心,識左好多人….係一個愉快童年…仲有我想講…黃竹坑同一座什至唔同座既人都好似一家人咁…成層樓d人都識既…我住5座既…個度d人個個日頭都打開門…好有安全既感覺…比起現在住呢個屋村…無人開門…真係有咩事都無人知…還有黃竹坑呢一種設計既屋村已經得番好小…但我感覺呢種設計係最好…人與人之間都close好多…對於學校同村既人都有好多回憶….可惜此情此景…已經不再….
您好,
相片攞咗喇,再次多謝你.
今次進來發現又多了人分享回憶,太好了.看著文字,畫面便會在腦海浮現出來呢.
雄，謝謝你也跟我們分享了你的回憶，你說得對，以前的鄰里關係現在都沒有了。
ivy，我讀著也很感動。
你好嗎
記得七座未有互委會前係通去8座的走廊,
有兩張乒乓球石枱,嗰度有好多仔打波
我係其中1個,如要打就要好早霸枱,
如果唔係呀要猜枱呀
輸咗要留波留扳惗起都好慘呀
家惗起都開心架
夏天嗰俥都幾大風架好靑涼呀
冬天死得到凍到入骨
你地有冇其他趣事呀分享1下啦
思賢，你好。謝謝你的分享。