Monthly Archives: February 2005

真道理總是老老土土的，徐小鳳（我的八字頭朋友會說：「嘩！誰來的！」）有句歌詞：「渴望是心中富有，名和利不刻意追求。」 早上的報章盡是林百欣先生逝世的報導。林伯是香港的典型富豪，工業起家，一生勤儉，有為他打江山的老妻，有當過舞女的小老婆，子女不長進，唯有不言休。報導說林伯身家豐厚，但晚年想找餐飯跟家人一起吃也難，餐餐自己食魚柳包。尋找快樂的反面教材，莫過於此。 林伯勤勞守信，值得我們敬佩，以前我在他贊助的林伯欣電影院（現在已改由agnès b.贊助）渡過了不了快樂時光，但其他方面實在不太值得羨慕，我不會想做他的兒子。再讀今天信報曹仁超的《富不過三代全球適用》，更覺是為林伯而寫： 摩根大通投資銀行研究顯示，全球超級富豪過去二十年有80％以上守唔住巨富！包括披頭四約翰連儂遺孀大野洋子及推廣迷你裙後以自己名字發展化妝品牌雅絲蘭黛．關。最新一期《福布斯》全球四百位首富排名榜與二十年前比較，只有五十位留低，包括畢非德、威廉福特、羅伊迪斯尼、運動品牌Nike創辦人奈特等。 摩根大通投資銀行研究所得，超級富豪家族後人都揮金如土，例如希爾頓酒店後人帕里斯希爾頓衣花費極之驚人。其次係高通脹下不擅投資，加上西方政府所抽重稅，以及打官司和被欺詐，都係令巨富後人保唔住家財理由。富不過三代全球適用。 決定你係窮人抑或富人有十大標準。 一、自我認知。窮人好少諗如何去賺錢及點樣才能賺到錢，好聽D係「安貧樂道」，唔好聽係「不思進取」。反之，富人天生強烈賺錢欲，會想盡一切辦法去致富。 二、休閒。窮人認為「食少多覺」，寧願花時間睇《大長今》，仲要加入《大長今》熱去吃韓菜。富人冇興趣睇肥皂劇，只會動腦筋《大長今》熱中賺一筆。 三、交際。窮人喜歡同窮人做朋友，心理上排斥有錢朋友，唔係有錢朋友睇唔起佢，而係自卑心作怪，結果只研究邊度有廉價套餐、邊間百貨公司大減價……。反之，富人交際往往研究股市點睇、市點睇、樓市點睇、邊處有錢搵。結果窮人只知邊度有廉價套餐邊處大減價，富人卻知道邊度有錢搵。 四、學習。窮人學手藝，以便一技旁身天下通行；富人學投資，懂得錢搵錢。 五、時間。窮人時間唔值錢，可以跑遍港九新界去買廉價貨慳番幾十蚊，但浪費一整天時間。富人閑，閑在身體，例如打高爾夫球其實係傾緊生意，腦袋冇一刻停過；窮人閑，閑在思想，忙去麻將桌上摸幾把或研究馬經。 六、金錢態度。窮人經濟觀係節省，勤與儉，慳得一萬就係一萬，甚至投資亦離唔開「雞生蛋」理論。例如我老曹2002年叫人買金，唔少人回答冇息收，佢地估唔到金價三年升值50％（由二百八十美元升至四百二十美元），而斤斤計較雞會否生蛋。幾多股份雖然冇息派，但一年股價上升100％，窮人一聽到冇息派已冇晒興趣。 七、激情與感情。窮人只有感情，聽完新馬師曾唱《萬惡淫為首》便流淚兼捐錢，感情太豐富兼有代入感，好易受感動。反之富人卻不易受感動，例如1989年六四事件居然認為滿街鮮血係入市時機。 八、自信與自卑。窮人自卑，有D錢便穿名牌戴名錶名車才能增加自信，十分介意人地點睇自己。富人自信而不自卑。李實發係典型例子，藍色西裝十年如一日，戴精工表，飲自己公司屈臣氏售賣廉價紅酒……。以前郭得勝又係另一例子，永遠坐日本車，因為慳油……。呢份自信令佢地光景不佳時唔悲觀，繁榮期亦只謹慎樂觀；反之，窮人繁榮期亂花錢，衰退期呼天搶地。 九、習慣。有個富人見自己親戚太窮，送一隻牛畀佢。窮人滿心歡喜，但諗到牛要食草，結果將牛賣掉，買D雞養希望生蛋，結果幾天一隻雞食，一年後富人去探望佢，佢依然故我仍然係窮人一名；窮人習慣今朝有酒今朝醉。原來富人自己年輕時亦冇錢，辛辛苦苦儲錢買隻牛，然後到處帶隻牛去食草奶賣，賺到錢便買羊生羊仔賣錢，然後開農場，最後變得富有。富人以為送隻牛畀親戚可令其發達，但唔明白窮親戚未養成儲蓄與投資習慣，每年送佢一隻牛亦無法脫貧。 十、上網。窮人上網搵娛樂，富人上網搵投資機會。結果窮人愈上網愈窮，富人愈上網愈富。 改變金錢觀念勝過留低家財 為何富不過三代？因富人只把財富留畀親人，而非改變佢地對錢觀念。一如上述富人向窮親戚贈牛，而非教佢養牛。 給窮人一條魚今餐佢有食，教曉佢捉魚佢便有謀生技能，培養佢管理漁場技巧佢便可以發達。貧與富最大分別在此！ 唔少人認為唔夠時間用，解決方法好簡單，就係將電視機關掉。1998年研究結果，一般人每天有5％時間浪費電視機前，睇電視結果係將10％收入花費無謂上（買自己唔需要）。睇電視已成為現代人最大浪費，包括時間與金錢。減少睇電視後，一般人感到人生快樂多15％，如把睇電視時間改為睇書，你會感到人生快樂多30％。換言之，如何從不滿足不快樂轉為滿足同快樂？方法好簡單，少睇電視多睇書便可以有一個快樂人生。令人快樂書係乜書？原來係有關浪漫小說，57％女性喜歡浪漫，43％男性喜歡浪漫，睇浪漫小說令人身心愉快。古典音樂及鮮花有助浪漫氣氛，情人節令人感到浪漫唔係鑽石，而係鮮花加古典音樂。 其實洋人和曹sir談快樂的文章，我以往也轉貼過： 曹SIR都教導人快樂之道 最佳的投資策略