Monthly Archives: April 2008

近期好像回到早年寫BLOG的日子，流行一題接力共寫。源頭好像是……妖，來來去去都係個班喇，你都知寫BLOG既友係幾小圈子。 假如我是女人： 會幾悲，因為生得唔高佻又唔靚，而且唔出聲時樣子重好兇。 唔靚都算喇，又唔叻，但又唔叻得來又唔夠天真同傻，重好多野諗，即係典型港女。 會一樣咁污糟辣蹋，簡單呢講應該係個干物女。 會唔化妝，因為覺得化左妝都唔會靚，如果化妝靚左，又會覺得自己好假。 個樣應該會比真實年齡後生，但唔等於後生就索。 可能會係同性戀，因為覺得男人太唔可愛同太狗，而女人又太可愛。 鐘意仔既話會鐘意梁朝偉或梁家輝或小田切讓或永瀨正敏或羅拔狄尼路；唔會鐘意哥哥，因為知道哥哥唔會鐘意我。 會更有條件發展自己野蠻和頑固的一面。 仍然會愛看電影，仍然會一個人看（應該都無仔會陪我喇），仍然會在戲院睡著。 會多睇幾本亦舒，甚至會睇埋嚴沁、岑海倫，但應該唔會多睇張小嫻，因為已經睇左亦舒喇。 唔會亂講粗口，因為成套廣東粗口詞彙，都係建基於男性攻擊女性或男性攻擊男性，女人用起上來好唔方便係好不利。 會是個八婆。 會用化名和假相撰寫深情寂寞博客文章挑逗麻甩男博客。（實情依家都得啦。） 會試下做記者，但唔會做公關。 會肥，因為貪吃和懶 會比男人欺騙，亦會女人欺騙，即係會被由男人及女人組成的人類欺騙。 會養貓，很可能在無仔溝的情況下以貓作伴終老。 會唔明白男人個心諗咩。 會開心，會唔開心，會驕傲，會自卑，會鬧情緒，會胡思亂想，會講錯說話，會有恐懼，會有遺憾，因為呢D野，男人女人都有。